sábado, 18 de noviembre de 2017

PRESENTACIÓN DEL LLIBRU "UN NATALIEGU PERBULLINDIEGU"

El xueves 30 de payares preséntase'l nuevu llibru en lligua asturiana y en eonaviegu.

Nesti actu, empobináu al públicu adultu, amás de presentar esti formosu cuentiquín, va falase sobro los fundamentos etnográficos de los vezos del Nataliegu y los Ramos de Nadal.

La presentación pa la reciella sedrá el 15 d'avientu na III Folixa de Nadal/Navidá, na Casa la Cultura -Avilés

Presentación del llibru "Un Nataliegu perbullindiegu"
AULA DE CULTURA -LA VOZ D'AVILÉS-EL COMERCIO-
Xueves, 30 de payares a les 19:30 hores
Salón d'actos del Centru de Servicios Universitarios de la Ferrería -Avilés-
Entrada llibre fasta enllenar l'aforu.

UFRIENDA´L NATALIEGU -2016

Falando del Nataliegu, axúntovos un par de vídeos sobro la ufrienda del Nataliegu desendolcada pola reciella del Colexu Públicu Sabugo na Folixa de Nadal/Navidá 2016 -Avilés-. 

Entamu la ufrienda'l Nataliegu

Sofitándomos nos versos del Romance de Galancina, que fai referencia a les celebraciones de les  Fogueres de Nadal, ellaboramos esta Rima´l  Nataliegu.


Rima´l Nataliegu

RIMA’L NATALIEGU 

¿Pa qué queréis tanta lleña,
pa qué queréis tanta lá?
Si tan feches les fogueres
de la nueche de Nadal.

¿Pa qué queréis tanta lleña,
pa qué queréis tanta lá?
Si yá arroxen los bollinos 
de milenta rapacinos.

¿Pa qué queréis tanta lleña,
pa qué queréis tanta lá?  
Si güei ñaz la lluz del llume
del tuerín de Navidá.

¡Colái, andancios y plagues!
¡Colái, bruxes encuruxaes!
¡Colái!, que’l fueu del Nataliegu   
de xuru vos va aburiar.
¡Colái! ¡Colái!

que yá tamos na Navidá.

LOS LLENDADORES DEL NATALIEGU

Anguaño   escomenzamos   con   una   perbona   sorpresa,   l'espublizamientu   del   llibru   “Un Nataliegu perbullindiegu “, u recuperamos los vezos del Nataliegu ya'l Ramu Nadal.

Incorporamos tamién a los nuevos personaxes de la Ñavidá asturiana Los lledadores del Nataliegu. L'Anguleru como primer llendador del Nataliegu, agabitáu polos sos collacios llendadores del ríu y la mariña (Los Ruleros -Lolina y Xesús-, El Faroleru, L'Ocleru).


LOS LLENDADORES DEL NATALIEGU 
Ilustración de Alberto Álvarez Peña y Víctor Raúl Pintado Rey -Vitu-

domingo, 30 de julio de 2017

Entrevista RPA - L'Anguleru 2017

El martes 25 de xunetu tuvimos charrando de L’Anguleru nel programa de la RPA – “La radio ye de mio”. Axúntovos l’enllaz. . 


sábado, 7 de enero de 2017

L'Anguleru nel Colexu Enrique Alonso d'Avilés

Axúntovos unes semeyes que mos apurrió, Lorena, una mestra d'infantil del Colexu Públicu Enrique Alonso d'Avilés. Munches gracies, un trabayu perguapu.





domingo, 1 de enero de 2017

II FOLIXA DE NADAL -SEMEYES-

AXÚNTOVOS LOS CARTELOS YA DALGUNES SEMEYES DE LA II FOLIXA DE NADAL

   














































II FOLIXA DE NADAL

II FOLIXA DE NADAL, ILUSIÓN NAVIDIEGA EN LLINGUA ASTURIANA

El vienres 16 d'avientu a les 19:00 hores, na Factoría Cultural d'Avilés celébrose segunda Folixa de Nadal. Dempués del ésitu del añu pasáu, L’Anguleru ya los/les Llendadores de la Ría vuelven faese un espaciu  na Axenda d'Actividaes Festives navidiegues del Conceyu d'Avilés.
Ello ye qu'anguaño, ye'l propiu Conceyu d'Aviles el qu’al traviés de Estaya de la Llingua entama ya coordina l'actu. Collaboren tamién nesta edición l'Asociación Cultural Garabuxada, Iniciativa pol asturianu, la Rula d’Avilés ya el Colexu Públicu Sabugo d'Avilés.
El cuentacuentos fo interpretáu por Olga Cuervo, una de les grandes actrices asturianes que más ciñu tien al públicu infantil.

Amás de l'habitual “Ufrienda´l Nataliegu” ya la Receición de los “Mestros Llendadores de la Ría”, lleales agabitadores de L’Anguleru, con L’APURRIMIENTU DEL AGASAYU ya la Recoyida les cartes, súmase nesta ocasión, el Nomamientu del Mestru Llendador 2016.

Un merecíu homenaxe a D. Pedro Solís Vílchez, un llobu mar que dedicó tola so vida a la pesca. Esti pesquín que lleva salitre nes sos venes, ye un home respetáu ya defensor del sector pesqueru. Foi secretariu de l'Asociación de Vecinos del Nodo n’Avilés ya na actualidá collabora como escritor na revista del Centru Social de Persones Mayores Xardín de Cantos, asina como en colexos espublizando la cultura pesquera asturiana. Ye un gran defensor de la pesca sostenible ya de les artes tradicionales, muncho más respetuoses col mediu ambiente. Criticó en más d'una ocasión la progresiva desapaición, nes nueses mariñes, d’especies como'l  besugu o la palombeta, etc., a causa del pocu respetu que se ta teniendo pola mar.

El nomamientu fo una reconocencia pública acompañada de la entrega d’una placa en reconocimientu al so llabor, ya d’una Montera Picona de “Mestru Llendador”.  Un actu peremotivu.

Recordar que los Mestros/es Llendadores son los/les agabitadores de L'Anguleru que tienen el privilexu de collaborar direutamente con elli. Son persones honorables ya respetaes que faen les coses con xacíu. Los ya les responsables dafechu de los calces. Encárguense de recoyer les cartes de L'Anguleru ya de repartir, xunto a elli, la nueche del 24 d'avientu L'Agasayu, llambionaes ya detallinos guapos de Nadal que traye L'Anguleru.