Axúntovos un testu lliterariu formosu que la Mayestra d'Infantil Charo Quintana Fernández apúrrenos a tolos amantes de L'Anguleru.
LA
MAXA DE L’ANGULERU
Fai díes que L’Anguleru, que sabe
lleer nes corrientes marines, prepara'l serazu y la llámpara de carburu. Los
esguinos de l'anguila avérense, lleven viaxando trés años y dispónense a
remontar el ríu onde'l pescador, paciente, espera. Él conoz les artes de la
pesca, entiende'l llinguaxe d'esos pequeños ensames plateaos que van y vienen
dende la mar de los Sargazos.
Les angules lleguen, como cada añu, a
la so cita col Nalón. De secute, una nueche, un 24 d'avientu, L’Anguleru, oi soníos
y estrema pequeños cocos de lluz allumando les foles; decátase de que los pexes
xueguen y fáenlo coles ayalgues qu'escuenden les fondures del océanu. Como si
d'un símbolu se tratare, harpes de ballena, coloríos paracayíes d'aguamala y fasta sorprendentes carreres de caballinos de mar animen el pasu de les
angules, esos seres marinos perpequeños. La caravana anuncia tiempos de
bonanza, alita'l ciclu de la vida nel pueblu; la xente mira nel calendariu'l
momentu de la so llegada y fasta los neños escuchen llatir una sonadiella
especial na redolada.
Dalgunos albidren, pero namás L’Anguleru
sabe'l significáu d'asemeyáu espectáculu, ye consciente del guapu regalu que la
naturaleza ufierta, una vegada más, porque los esguinos guarden so la piel
sedoso’l milagru d'un tiempu especial: les hores de la Nuechebona cuando nos
llagos, regueros, pequeños y grandes ríos apaez el barcu de L’Anguleru cargáu
colos suaños de los neños y les neñes. Suaños que se tresformen en xuguetes al
llegar a cada casa p'alitar la maxa de lo posible, l'inmensu placer de les
bullindiegues rises infantiles.
Charo Quintana Fernández
Mayestra d'Infantil
No hay comentarios:
Publicar un comentario